生蠔用佢哋嘅鰓同埋唇瓣嘅觸毛，去濾食海水中嘅海藻同浮游生物，但唔好誤會佢哋係「海洋清道夫」，佢哋雖然係無腦，但係就識得將食物同非食物分類，排出真糞便（feces）同假糞便（pseudofeces）。同小編一樣，生蠔係非常之為食，好似美國Virginica生蠔，每日就可以濾食50加侖嘅海水。

平時令我哋又愛又恨嘅帶子位，亦即係生蠔嘅閉合肌。閉合肌嘅收縮舒張，控制咗海水流量，幫助生蠔攝食同呼吸，而當有外物入侵嘅時候，生蠔嘅閉合肌亦發揮作用，將蠔殼緊緊閉合，保護自身。喺海流強嘅地方，生蠔嘅閉合肌就特別運動得多，比較強壯。咁係咪即係愈健壯嘅生蠔愈難開？又唔一定，視乎品種同殼形啦。

重要資訊，生蠔無中樞神經系統，所以生蠔係冇痛楚感。但佢亦有心臟，將無顏色嘅血液供給全身，亦有腎臟過濾血液中嘅雜質。

唔講你未必知，其實生蠔可以話係海洋生態嘅保衛者。

綜觀全球，有多達個500個「死亡海域」，所指嘅係工業污染下間接造成、海洋生物難以生存嘅低氧水域，合計面積大過一個非洲。工業污水含有大量氮、磷等植物營養物，往往令海藻過度繁殖，紅潮下不僅令海水缺氧，海藻亦有可能纏住魚鰓，造成海洋生物大量死亡，香港海洋亦有面對住呢個問題。

唔係所有海藻都係因為工業污染而增生，水溫水流本身亦有影響，但無論如何，由於生蠔專食海藻同富營養嘅浮游生物，就有效維護咗生態平衡。另外，食完蠔嘅蠔殼，亦都可以交俾國際自然保護組織回收，經處理後重投海洋以建立蠔礁，間接幫助化水質、修復海洋生態。

生蠔同海洋相互影響，生蠔淨化咗水質，而水域中本身嘅海藻生物，亦影響住生蠔嘅風味（merrior）。酒有「terrior」，蠔就有「merrior」，因為喺法文中mer就係海嘅意思，不同水域有不同嘅礦物含量、水流強度、海藻種類、鹽度、溫度等，就帶俾生蠔不同嘅風味，同一品種生蠔，不同季節亦風味亦有差異。